الكذب فن

20 يونيو، 2018 Off By MishaL78
ودي اليوم أتكلم على شي تكلم عنه ناس واجد .. اهو الجذب وبالعربية الفصحة (الكذب) أول ما كتبت هالكلمة بالقوقل طلع لي تعريفها هذا
الكذب هو أن يخبر الإنسان عن شيء بخلاف الحقيقة , ويكون إما بتزييف الحقائق جزئيا او كليا او خلق روايات واحداث جديدة ، بنية وقصد الخداع لتحقيق هدف معين وقد يكون ماديا ونفسي واجتماعي وهو عكس الصدق، والكذب فعل محرم في جميع الأديان. الكذب قد يكون بسيطا ولكن اذا تطور ولازم الفرد فعند ذاك يكون الفرد مصاب بالكذب المرضي . وقد يقترن بعدد من الجرائم مثل الغش والنصب والتزوير والسرقة. وقد يقترن ببعض المهن او الادوار مثل الدبلوماسية او الحرب النفسية الاعلامية او التسويق.
ركزوا على اللي باللون الاحمر ( التسويق) قوية ..
وأقوى نوع من هالتسويق شفته في معرض للعقار وهو انك تشتري قطعة أرض على سطح القمر ..
ومندوب التسويق الواقف قاعد يقنعني ان فعلاً تقدر تشتري أرض بالقمر .. لا وأهو الوسيط .. شسالفة أرض بالقمر ؟ شدعوة
الجذب مشكلة .. وفي ناس يجذبون على أتفه الاسباب يعني تكون مواعد واحد تروحون مكان عادي يعني ومومهم وعادي تقدرون تكنسلونه ..وتقوله ها وين كنت أو شفيك تأخرت .. يعطيك وحدة قوية عن اهله وحالتهم يخليك تحس بالذنب لأن خلاهم وجالك ..وتصير طول الطلعة ضيقة خلق .. انزين جذب بحدود المعقول .. أو شالمشكلة اذا قلت الصج ؟ ترا عادي ما فيها شي .. خير ياطير اذا قلت انك متأخر .. لا تحط في بالك إنك مواعد شخصية مهمة حيل .. يالطيب .. ترا انا رفيجك .. ماله داعي الجذب وفوق كل هذا محد سألك ليش تأخرت !!!
المهم .. مرة يوم كنت صغير شريت شريط فيديو من مجمع النقرة … طبعاً الكل عرف المحل .. اي يا شباب يا فيديو الوسام يا مركز الفنون أو الحزام الأزرق ههههههههههه .. المهم الشريط كان من افلام ديزني .. واسمه بنوكيو .. وكان مدبلج للهجة المصرية والقصة ان في لعبة خشبية تتحول حق ولد حقيقي .. ومن احداث الفلم ان الولد كل ما يجذب خشمة يصير طويل ..
تخيلوا يا جماعة لو كان هذا فعلاً اللي يصير لو كل واحد جذب وقام يطول خشمة .
الايجابيات
راح نعرف من الصاج ومنو الجذاب
راح يزيد الطلب على تخصص التجميل بكلية الطب لان عدد الراغبين في عملية تقصير الانف (قص الخشوم) راح يزيد ويتم التنافس الطبي بين مختلف المستشفيات والجامعات وتزيد البحوث العلمية ويعكف الطلبة والدكاترة على اكتشاف طرق جديدة لعمليات تجميل الانف بالذات
راح تصير موضة جديدة اللي اهي لبس القناع الطبي وإدعاء الخوف من الانفلونزا أو فوبيا الجراثيم .. وبالطبع علشان يغطون خشومهم من الجذب .. وكل مرة يتفنتكون البنات بقصة خشم غير .. مرة نفس الفنانة الفلانية ومرة نفس الفنانة العلانية..والحجي اذا وحدة سوت خشم وما عجبها .. تقط لها جم جذبة وتسوي خشمها مرة ثانية. سهالات
راح يرتاحون البنات اللي خشومهم طوال بالأساس واذا سألوهم الناس اوله شكبر خشمج.. راح ترقع وتقول ( من الجذب ) سهالات
السلبيات
لايوجد …. وإن وجد راح تكون السلبية الوحيدة اهي الطوابير عند عيادة التجميل
هذه كلها خيالات .. شنو المشكلة اذا الواحد ما جذب .. ؟