الكويتيين ليلة العيد

19 يونيو، 2018 Off By MishaL78

 

 

للأمانة الادبية هذا برود كاست واصلني وشدت عضلات بطني من الضحك عليه .. فعلاَ اذا مو فيه وحدة ولا ثنتين صايريين فيك .. أنت مو كويتي

نبدي

· بالعشر الأواخر من رمضان نسمع دوي وصراخ الحريم والرياجيل : الناس خلصوا يا حظي وأنا حالتي حالة كل عيد أحوس .. والرجال مستعجل على الدوانية ويقول شلون يعني ما اقعد حالي حال ربعي بالدوانية مرتاحين ؟ لازم ركض وراج وما تخلصين ..

· ليلة العيد الرجال ركض يطلع هدومة من الخياط والغترة من المصبغة قبل لا تسكر .. وطابوووووور الحلاق .

· ليلة العيد المره تركض ترقع اللي تقدر ترقعة بالمشتريات الغلط ..يا بوويي .

· هوشات المره مع الخدامة بالتلفون وهي برا البيت : سبحي العيال وسكري التكييف لا يمرضون مو وقتة أول يوم أعييد بالأميري ..

· تفكير قاسي في العقل الباطن للمره : شنو راح يلبسون ؟ بيطلعون أكشخ مني أكيد .. هذه حالتي كل عيييد.

· ليلة العيد …. طبعاَ كالعادة محد ينام .

· الاغراض ضايعة .. البدل خربانة … البوك والساعة ملوت الجهال لازم بكراتينهم .

· تلفزيون الكويت كالعادة الفجر فلم تاريخي مصري .. والصبح يدندن عوض الدوخي عيد يا سعيد بالعيد .

· الصبح محد يشوف الثاني من الركض بسرررعة منو يطلع يزور الأول.

· العيال يترززون لابسين اول الناس ويتوصخون أول الناس.

· الحريم كل دقيقة كفخة على راس الجاهل لاتخربين شعرج عمى .. لا توصخ دشداشتك يا ويلك والله أذبحك .. وبوكك لا يبوقونة الخدم نفس كل عيد .

· الصبح الناااس بالسيارات ونص قافل يبي ينام ونص يقاوم.

· ويكملون المسيرة والعيال لا زالوا يترززون ما تعبوا متسمتين.

· العيال يفكرون بالحدايق … فراااغة عل هالصبح.

· الكبار يفكرون متى نخلص نبدل وننام .

· الغدا كالعادة لحم.

· الطلبات من المطاعم تكثر والهوشات تزيد … لو سمحت صارلي ساعتين طالب .

· الساعة 3 العصر هدوووووء يعم أرجاء المنزل .

· الجهال خلصت بطاريتاهم أخيرا وقاموا يتسدحون بالصالة.

· المغرب هوشات حلوة مع الخدم على عيادي الجهال.

· ويقعدون الكويتيين مصحصحين شحلاتهم – المكياج سايح والبيت حايس.

· سوالف الحريم : وبس خلص العيد .. بغينا نموت ما يسوى علينا اللبس .

· وكل سنة شعارهم العيد الجاي بإذن الله بخلص أغراضي قبل العيد …

مااااكوووو فايدة …