روح التنافس المعدومة

15 سبتمبر، 2018 Off By MishaL78

 

 

 

 

روح التنافس بالكويت بشكل عام معدومة جداً .. مثلاً جهة معينة تعلن عن مسابقة وتحط شروطها ويختارون اللي يشوفونه انسب لهم .. وبعد النتايج, يبدون يهاجمون قرار الجهة بخصوص اختيارهم مع العلم ان الاختيار وقع على شي جديد وفق شروطهم ما سبق انه طلع منه خير او شر .. يعني شي جديد, ويبتدي الذم وانه اختيارهم سيئ والمفروض يختارون واحد نفس صاحبهم لانه اهو اللي يستحق وغيره لأ .. طيب صاحبكم مو مستوفي الشروط المطلوبة ؟

على اي اساس حطيتوا ان صاحبكم الاجدر ؟ وصاحبكم ليش شارك اصلاً دام مو عاجبته الشروط ؟ المسابقة لها شروط معينة مايصير لما تطلع النتيجة, مو على هواكم تبدون تهاجمون وتشهرون بالمسابقة او المنصب لأنه ما صار لكم نصيب فيه .. هذا اسمه خِسّة وحقارة ودناءة وانعدام روح المنافسة, لذلك يا اخواني واخواني … نصيبك ورزقك راح يجيك وين ما كنت، تحلى بالاخلاق وروح المنافسة واترك عنك التهجم على الغير كونهم ما اختاروك, هالشي نشوفه حالياً بشكل مباشر بالميديا .. تلقاهم يسبون بعض علشان واحد تنافس مع غيرك على شركة دعايات وخسر ويبتدي يسب الشركة واللي اختارته, وكذلك الحال بالمناصب ومسابقات التصوير وغيرهم من الامور اللي تطلب وجود روح تنافسية وليست روحاً محبة للحقد والحسد وتمني زوال النعمة للغير.